Umwaka wari ushize mu Bushinwa by’umwihariko mu Mujyi wa Wuhan, ahatangiriye icyorezo cya Covid-19 mu 2019 nta murwayi wayo uhaboneka gusa ibintu byahindutse.
Kugeza ubu ubwoba ni bwose kuko muri uwo Mujyi hongeye kugaragara abantu banduye Covid-19.
Byatumye u Bushinwa bwongera gukangarana nyuma y’uko hongeye kugaragara abarwayi ba Covid-19 bagera kuri 300 mu minsi 10 gusa.
Igiteye impungenge ni uko ubwandu bukomeje kugaragara mu Ntara 15 zitandukanye ari nabyo bigiye gutuma Guverinoma ishyiraho ingamba zo gupima abantu benshi ndetse ngo hashobora no gushyirwaho Guma mu Rugo mu bice bimwe byagaragaramo ubwandu bwinshi.
Inzego z’ubuzima zitangaza ko ubwandu bushya buri kuboneka buri guterwa ahanini n’ubwoko bushya bwa virus ya Delta n’ubukerarugendo bw’imbere mu gihugu.
Umujyi wa Wuhan na wo ugiye gutangira gupima abaturage bawutuyemo.
