Ibihugu by’i Burayi byatangiye gutegura uburyo doze z’urukingo rwa Covid-19 zishobora kuba eshatu kubera ubukana bw’iki cyorezo cyane cyane ubwa virus zihinduranyije kuko urukingo rwari rwarakozwe rwo kurinda Covid-19 hari amahirwe make y’uko rushobora kurinda iyihinduranyije.
Umuyobozi w’itsinda rishinzwe iby’inkingo za Covid-19 mu Bubiligi, Professor Dirk Ramaekers, yavuze ko mu masezerano u Burayi buzagirana n’ibigo bikora inkingo, hashobora kongerwamo n’ayo gukora doze ya gatatu y’urukingo igenewe kurinda Coronavirus yihinduranyije.
Kugeza ubu Covid-19 imaze kwihinduranya inshuro zitabarika ariko mu zihinduranyije harimo izifite ubukana cyane kuruta izindi, harimo iyabonetse mu Bwongereza, Afurika y’Epfo, Brésil n’u Buhinde.
Iyabonetse mu Buhinde ubu niyo ihangayikishije cyane kuruta izindi kuko yandura ku rugero rwa 60% kurusha uko Covid-19 isanzwe yandura. Iyo mu Bwongereza yo yandura ku rugero rwa 40% .
Professor Dirk Ramaekers yavuze ko u Burayi buzavugurura amasezerano ku bijyanye n’inkingo, bagashyiramo ko hakorwa na dose ya gatatu yo kurinda Coronavirus yihinduranyije.
Yagize ati “Mu mpera z’uyu mwaka cyangwa mu ntangiriro z’utaha, inkingo zose zizakorwa hagomba kwiyongeraho na doze ya gatatu yo kurinda Coronavirus yihinduranyije. Kandi na sosiyete zikora inkingo birasa nk’aho zifite ubushobozi bwo kubikora.”
Nubwo bitaremezwa neza ko uru rukingo ruzakorwa, 7sur7 yatangaje ko muri iki gihugu hari ibimenyetso byerekana ko hari gutegurwa doze ya gatatu y’urukingo rwa Covid-19, gusa ntiharamenyekana niba ruzahabwa itsinda rimwe ry’abantu bafite ingaruka nyinshi zo kuzahazwa na Covid-19 cyangwa ruzahabwa abantu bose.
Kugeza ubu ku Isi yose haracyari ikibazo cy’inkingo, kuko hamaze gutangwa doze miliyari 2.5 z’inkingo za Covid-19, mu gihe abantu bamaze guhabwa doze ebyiri ari miliyoni 748 bangana na 9.6% by’abatuye Isi bose.
Ku mugabane w’i Burayi na Aziya niho hamaze gukingirwa abaturage benshi ugereranyije n’indi migabane, ndetse muri Afurika igihugu kimaze gukingira benshi ni Maroc imaze gukingira 22.1% by’abaturage bayo bose.
