Urukingo rwa Coronavirus rwakozwe n’Abanyamerika, Moderna, rwabaye urwa kabiri rwemejwe n’iki gihugu nk’urushobora kwifashishwa mu guhangana n’ubwiyongere bw’iki cyorezo gikomeje gufata indi ntera.
Ikigo gishinzwe Ibiribwa n’Imiti muri Amerika, FDA, cyatangaje ko urukingo rwa Moderna rushobora gukoreshwa. Ni nyuma y’icyumweru kimwe hemejwe urwa Pfizer/BioNTech rwatangiye no gutangwa mu gihugu.
Amerika yemeye ko igiye kugura inkingo miliyoni 200 za Moderna, aho magingo aya miliyoni esheshatu zazo zihari ku buryo zatangira gukwirakwizwa.
Amerika ni cyo gihugu gifite umubare munini w’ubwandu bwa Covid-19 ndetse n’impfu nyinshi kugeza ubu. Ubu imaze gupfusha abantu 313.500 mu gihe miliyoni 17.5 bo banduye.
Kuri uyu wa Gatanu, FDA yavuze ko urukingo rwa Moderna rushobora gutangira gukoreshwa mu bikorwa by’ubutabazi ndetse ko ari intambwe ikomeye igihugu giteye mu guhangana n’ubwiyongere bw’iyi ndwara.
Urukingo rwa Moderna rwizewe ku kigero cya 94% nk’urushobora kurinda umuntu kwandura kuko rutuma umubiri we ugira ubwirinzi ukabasha guhangana n’ikwirakwira ryacyo. Rubikwa ahantu hari ubukonje bwa dogere Celsius -20 rukaba rwahamara amezi atandatu.
Uru rukingo rugura amadolari 33 ya Amerika, ni ukuvuga asaga ibihumbi 32 Frw, mu gihe urwakozwe na Pfizer/BionTech rwo rugura amadolari 20, ni hafi ibihumbi 20 Frw.
