Home Imikino CAN 2023: Nigeria yatsinze Côte d’Ivoire, Misiri inganya na Ghana

CAN 2023: Nigeria yatsinze Côte d’Ivoire, Misiri inganya na Ghana

by Nsabimana Jean Claude
0 comment

Ikipe y’Igihugu ya Nigeria yigaruriye icyizere itsinda iya Côte d’Ivoire igitego 1-0 mu gihe Misiri yanganyije na Ghana ibitego 2-2 mu mikino y’Umunsi wa Kabiri w’Amatsinda y’Igikombe cya Afurika cya 2023.

Mu Itsinda A, Nigeria yari yatangiye inganya umukino wa mbere, yasabwaga kwitwara neza imbere ya Côte d’Ivoire yari yatsinze umukino ufungura irushanwa.

Umukino watangiye amakipe yombi agerageza gukina nta n’imwe ubona irusha indi. Nigeria ni yo yabonye uburyo bwa mbere ku munota wa karindwi, Victor Osimhen atera umupira hejuru y’izamu.

Ku munota wa 14, Ikipe y’igihugu ya Côte d’Ivoire yabonye uburyo imbere y’izamu bwashoboraga kuvamo igitego ku mupira Christian Kouame yabonye ari mu rubuga rw’amahina ariko awutera mu maboko y’umunyezamu.

Nigeria na yo yabonye amahirwe imbere y’izamu yashoboraga kugira ikivamo aho Ademola Lookman yahaye umupira Samuel Chukueze ariko agiye kurekura ishoti ba myugariro ba Côte d’Ivoire bahita batabara.

Côte d’Ivoire yakinaga neza, abakinnyi nka Seko Fofana bagerageza gutungura umunyezamu, barekura amashoti ariko ntibibakundire.

Mu gice cya kabiri, Nigeria yaje yahinduye umuvuno ariyo ikina isatira cyane ndetse ku munota wa 50 yahise ibona penariti ku ikosa Ousmane Diomande yakoreye Victor Osimhen ari mu rubuga rw’amahina.

Yahise iterwa neza na Kapiteni William Ekong igitego cyabonetse mu mukino. Côte d’Ivoire yakomeje gukina neza, ariko uburyo bwose yabonye ntibwatanga umusaruro.

Umukino warangiye Côte d’Ivoire iri mu rugo itsinzwe igitego 1-0, biyishyira ku mwanya wa gatatu n’amanota atatu aho izaba isabwa gutsinda umukino wa nyuma mu Itsinda A izahuramo na Guinée équatoriale.

Itsinda A riyobowe na Guinée équatoriale n’amanota ane, iyanganyaga na Nigeria mu gihe Guinée Bissau yamaze gusezererwa kuko nta nota irabona mu mikino ibiri yakinnye.

Umukino wasoje iyabaye ku wa Kane ni uwo mu Itsinda B aho Misiri yanganyije na Ghana ibitego 2-2, ibihugu byombi byishyira mu bibazo byo guhatanira itike ya 1/8 ku munsi wa nyuma.

Ibitego bya Ghana byatsinzwe na Mohamed Kudus ku munota wa 45 n’uwa 71 naho Misiri yavunikishije Mohamed Salah mbere y’uko igice cya mbere kirangira, yishyurirwa na Omar Marmoush na Mostafa Mohamed ku munota wa 69 n’uwa 74.

Ku wa Gatanu, Cap-Vert izakina na Mozambique mu wundi mukino wo muri iri tsinda uzatangira saa Kumi.

Guhera saa Moya z’umugoroba hazakina Itsinda C aho Sénégal izakina na Cameroun naho Guinée ikine na Gambia saa Yine z’ijoro.

Fofana wa Côte d’Ivoire ahanganiye umupira na Onyeka

Victor Osimhen yagoye ubwugarizi bwa Côte d’Ivoire

Related Articles

Leave a Comment