Ikigo gishinzwe Imisoro n’Amahoro muri Uganda, URA, cyasabye umuhanzi akaba n’Umunyapolitike Robert Kyagulanyi uzwi nka ‘Bobi Wine’ kwishyura miliyoni 337 z’amashilingi (arenga miliyoni 92 Frw) nk’imisoro ku modoka ye idatoborwa n’amasasu.
Mu ntangiriro z’uku kwezi kwa Mata nibwo Bobi Wine yemeye gutanga iyi modoka ye ngo yongere gusuzumwa agaciro kayo nyuma y’igihe kinini yari amaze aharira na URA yavugaga ko iyi modoka yinjijwe bwa mbere muri Uganda hibeshywe ku gaciro kayo igacibwa imisoro iri hasi.
Amakuru dukesha The Nation agaragaza ko ibaruwa URA yandikiye Bobi Wine ku wa 22 Mata imusaba kwishyura imisoro ya miliyoni 92 Frw kubera ko isuzumwa ryakorewe imodoka ye ryasanze ifite agaciro k’asaga $166,700 (miliyoni 164 Frw).
Mu isuzuma ryari ryabanje, iyi modoka yari yabariwe agaciro ka miliyoni 42 Frw. Mu kugena iyi misoro URA ngo yashingiye kandi ku kuba iyi modoka ya Bobi Wine idatoborwa n’amasasu, ibintu bituma imisoro iyibarwaho yiyongera.
Iyi modoka yo mu bwoko bwa Toyota Landcruiser Bobi Wine yavuze ko yayihawe nk’impano n’Abanya-Uganda baba mu mahanga bamushyigikiye mu rugendo rwa Politike.
