Ku gicamunsi cyo kuri iki Cyumweru tariki ya 2 Gicurasi 2021, Visi Perezida wa FERWAFA, Habyarimana Marcel ‘Matiku’, yashyikirije ubuyobozi bwa APR FC igikombe cya Shampiyona, iyi kipe yegukanye mu mwaka ushize w’imikino wa 2019/20, ariko ikaba itaragiherewe igihe kubera icyorezo cya COVID-19.
Inama ya Komite Nyobozi ya FERWAFA yateranye ku wa 22 Gicurasi 2020, yafashe icyemezo cyo guha APR FC igikombe cya Shampiyona y’Icyiciro cya mbere mu Rwanda mu mwaka w’imikino wa 2019/20.
APR FC yemejwe nk’ikipe yatwaye Igikombe cya Shampiyona nyuma y’icyemezo cyo kuyisoza imburagihe kubera icyorezo cya Coronavirus.
Hari nyuma y’uko ubwo Shampiyona y’Icyiciro cya Mbere yahagararaga muri Werurwe 2020 kubera Coronavirus, APR FC yari ku mwanya wa mbere n’amanota 57 mu mikino 23, ikurikiwe na Rayon Sports yari ifite amanota 50. Umunsi wa 24 wa Shampiyona wateshejwe agaciro kuko hari amakipe yari atarawukina.
Umunya-Maroc Adil Mohamed yafashije APR FC kwegukana Shampiyona idatsinzwe mu mwaka we wa mbere ayitoza. APR FC yatsinze imikino 17, inganya itandatu muri 23 yakinnye muri uwo mwaka w’imikino wa 2019/20.
Abakunzi ba APR FC ntibabonye amahirwe yo kwishimana n’ikipe yabo kubera ibihe bya Coronavirus byatumye Shampiyona isozwa imburagihe ndetse no kuri iyi nshuro ntibyakunze ko bitabira umuhango wo gushyikirizwa iki gikombe kuko abafana batarakomorerwa.
APR FC yari irangajwe imbere na Chairman wayo, Maj Gen Mubaraka Muganga, yashyikirijwe igikombe kuri Stade ya Huye mbere yo guhura na Gorilla FC mu mukino ubanza wo mu itsinda A rya Shampiyona ya 2021.
Igikombe cya Shampiyona cyahawe APR FC ni icya 18, Ikipe y’Ingabo yegukanye mu mateka yayo.
