Muri Leta zunze Ubumwe za Amerika bari mu munsi wa kabiri wo kubarura amajwi. Umukandida w’Abademokarate, Joe Biden, akomeje kuza imbere aho muri iki gitondo cyo ku wa Kane tariki 05 Ugushyingo 2020 ageze ku majwi 264 mu gihe uwo bahanganye Donald Trump we afite amajwi 214.
Joe Biden niyegukana intsinzi azungirizwa na Kamala Harris, uyu akaba ari umugore w’umwirabura watanzwe n’ishyaka ry’Abademokarate kugira ngo azafatanye na Joe Biden nka Visi Perezida.
Joe Biden yavuze ko niyegukana intsinzi iba ari iy’Abanyamerika bose. Naho mugenzi we bahanganye Donald Trump yumvikanye anenga imigendekere y’aya matora, avuga ko atakozwe mu mucyo, ndetse ko habayemo kwiba amajwi.
Donald Trump kandi yavuze ko agiye kwitabaza Urukiko rw’Ikirenga kugira ngo rumurenganure.
Ikindi cyagaragaye muri Amerika ni imyigaragambyo y’abashyigikiye Donald Trump batiyumvisha uburyo umukandida wabo yatsinzwe muri Leta zimwe na zimwe Aba Republicains basanzwe bafitemo abayoboke benshi, bagasaba ko kubara amajwi byasubirwamo.
