Ubushinjacyaha bwasabye Urukiko rwisumbuye rwa Nyarugenge kutakira ubujurire bwa Paul Rusesabagina ku mwanzuro wafashwe w’uko igihe cyo gufungwa by’agateganyo kwe cyongerwa, icyemezo giheruka gufatwa n’urukiko rw’Ibanze rwa Kicukiro.
Mu iburanisha rya none, haherewe ku nzitizi yatanzwe n’ubushinjacyaha, bwasabye ko iki kirego kitari gikwiye kwakirwa mu bujurire ku ifungwa ry’agateganyo rya Paul Rusesabagina, kubera ko bwatanzwe ibihe biteganywa byararenze.
Iri buranisha ryabaye hifashishijwe ikoranabuhanga mu gihe ku wa Gatanu w’icyumweru gishize ryari ryasubitswe kugira ngo Rusesabagina abanze abonane n’umwunganizi we, Me Gatera Gashabana, kandi ngo byarakozwe.
Umushinjacyaha uyu munsi yavuze ko ifungwa ry’agateganyo ryemejwe mu 23 Ukwakira 2020, ariko nyuma ngo yaje kujurira, ku wa 29 Ukwakira 2020 nibwo imyanzuro y’ubujurire yabanje gutangwa na Me Éméline Nyembo, ku wa 10 Ugushyingo hashyirwamo indi ya Me Gatera Gashabana.
Ubundi ngo itegeko rigena iminsi itanu ngo umuburanyi abe yamaze gutegura no gutanga umwanzuro we, ariko ngo Rusesabagina n’abamwunganira barengeje ibyo bihe. Bityo kuba imyanzuro y’ubujurire yaratanzwe nyuma y’ibihe biteganywa, Urukiko ntirwari kwakira ubu bujurire.
Umushinjacyaha yavuze ko umwanditsi w’urukiko yari afite ububasha bwo kwanga kwakira ubujurire bwa Rusesabagina kubera ko butakozwe mu bihe biteganywa, ari nayo mpamvu basaba ko habaho gusuzuma ubu busabe mbere y’iburanisha.
Me Gatera Gashabana yavuze ko ariko urubanza rwajuririwe ku gihe ndetse rugahabwa nimero. Ngo ubujurire bwakiriwe ku wa 24 Ukwakira 2020, bwandikwa ku wa 29 Ukwakira 2020.
Yavuze ko kuba urubanza rwaranditswe ari uko ikirego cyatanzwe mu bihe biteganywa.
Me Gatera yavuze ko ubujurire bwatanzwe nyuma y’umunsi umwe urubanza rusomwe, noneho imyanzuro ikorwa ishimangira ubujurire, ku buryo basanga inzitizi y’ubushinjacyaha Zigamije kubatesha umwanya, ahubwo Urukiko rukwiye gutegeka bagakomeza kuburana.
