Home Imikino Igitego cyo hanze cyafashije AS Kigali gusezerera KCCA FC yo muri Uganda muri CAF Confederation Cup.

Igitego cyo hanze cyafashije AS Kigali gusezerera KCCA FC yo muri Uganda muri CAF Confederation Cup.

by Nsabimana Jean Claude
0 comment

Igitego cyo hanze cyafashije AS Kigali gusezerera KCCA FC yo muri Uganda mu ijonjora rya kabiri rya CAF Confederation Cup nubwo yatsinzwe 3-1 mu mukino wo kwishyura wabereye kuri Stade ya Saint Mary’s Kitende kuri uyu wa Gatatu.

KCCA yafunguye amazamu ku isegonda rya 20 ku gitego cyatsinzwe na Brian Aheebwa mu gihe uyu rutahizamu uhagaze neza muri Uganda, yatsinze icya kabiri ku wa 37 ku mupira yaherejwe na Bright Anukani.

Uburyo bubiri bukomeye AS Kigali yabonye mu gice cya mbere ni ishoti ryatewe na Shabani Hussein ‘Tchabalala’ rikurwamo na Charles Lukwago mbere y’uko na Muhadjiri atera ishoti ryanyuze ku ruhande.

Habura iminota itatu ngo igice cya mbere kirangire, umutoza Nshimiyimana Eric yakoze impinduka ya mbere, Ntamuhanga Tumaine ‘Tity’ asimburwa na Orotomal Alex.

Nyuma y’iminota itatu igice cya kabiri gitangiye, AS Kigali yabonye penaliti yatsinzwe na Hakizimana Muhadjiri nyuma y’ikosa Musa Ramathan yakoreye kuri Abubakar Lawal mu rubuga rw’amahina.

AS Kigali yongeye gukora impinduka ku munota wa 64, Hakizimana Muhadjiri wari ufite ikarita y’umuhondo, asimburwa na Rurangwa Mossi.

Habura iminota 15 ngo umukino urangire, Brian Aheebwa yatsinze igitego cya gatatu cya KCCA mu gihe yananiwe gutsinda icya kane ku buryo yabonye ku munota wa 88, umupira ufatwa na Bate Shamiru.

Ku munota wa mbere muri itatu y’inyongera yashyizweho n’abasifuzi b’Abanya-Kenya, KCCA yabonye uburyo bukomeye ku ishoti ryatewe na Aheebwa, Bate Shamiru ashyira umupira muri koruneri mu gihe umusifuzi wo ku ruhande yerekanye ko habayeho kurarira.

Umukino warangiye ari 3-1, AS Kigali ikomeza ku gitego yatsindiye hanze nyuma yo kunganya ibitego 3-3 mu mikino yombi.

Umukino ubanza wagombaga kuba tariki ya 23 Ukuboza 2020 i Kigali, ariko AS Kigali ihabwa ibitego 2-0 bya mpaga kuko KCCA itari ifite umubare uhagije w’abakinnyi, aho bamwe barwaye COVID-19.

Mu cyiciro kibanziriza amatsinda ya CAF Confederation Cup, AS Kigali izahura n’imwe mu makipe asezererwa mu ijonjora rya kabiri rya CAF Champions League.

Abakinnyi babanje mu kibuga ku mpande zombi

AS Kigali: Bate Shamiru, Bayisenge Emery, Karera Hassan, Ishimwe Christian, Rugirayabo Hassan, Ntamuhanga Tumaine, Nsabimana Eric, Kalisa Rachid, Shaban Hussein ‘Tchabalala’, Hakizimana Muhadjiri na Abubakar Lawal.

KCCA: Lugwako, Iguma, Musa, Bukenya, Mugume, Achai, Kafumbe, Kezironi, Anukani, Ssenyonjo na Aheebwa.

Related Articles

Leave a Comment