Ibitego bibiri bya Hakizimana Félicien n’ikindi cyatsinzwe na Mugenzi Bienvenu kuri penaliti, byafashije Marines FC gutsindira Kiyovu Sports 3-0 i Nyamirambo kuri uyu wa Kabiri.
Aya makipe yombi yaherukaga kwitwara neza ku munsi wa mbere wa Shampiyona wabaye mu cyumweru gishize, aho Marines FC yari yatsinze Gorilla FC mu gihe Kiyovu Sports yatsinze Mukura Victory Sports.
Marines FC yafunguye amazamu ku munota wa 15 w’umukino ku gitego cyatsinzwe na Hakizimana Félicien watereye ishoti inyuma y’urubuga rw’amahina, umunyezamu Kimenyi Yves ntiyawugeraho.
Uyu myugariro w’ibumoso ni na we watsinze igitego cya kabiri ku munota wa 50, ku mupira w’umuterekano yatereye inyuma y’urubuga rw’amahina, abakinnyi ba Kiyovu Sports bibwiraga ko ujya hanze, bisanga uruhukiye mu rushundura.
Mugenzi Bienvenu yashimangiye intsinzi y’ikipe y’i Rubavu ku munota wa 66, ku gitego yatsinze kuri penaliti ubwo Dusingizimana Gilbert yari agushije Ishimwe Fiston mu rubuga rw’amahina.
Kiyovu Sports yagowe n’ubwugarizi bwa Marines FC n’umunyezamu Ntwari Fiacre, yashobora gutsinda igitego mu minota ya nyuma y’igice cya mbere, umupira uteretse watewe na Dusingiziman Gilbert ukubita umutambiko w’izamu.
Kimenyi Yves yarokoye Kiyovu Sports mu minota y’inyongera, akuramo penaliti yatewe na Ishimwe Fiston.
Kiyovu Sports izasubira mu kibuga ku wa Gatanu ihura na APR FC mu gihe Marines FC izaba yakiriye Sunrise FC.
Abakinnyi babanje mu kibuga ku mpande zombi:
Kiyovu Sports: Kimenyi Yves, Serumogo Ally, Dusingizimana Gilbert, Ngandu Omar, Habamahoro Vincent, Armel Ghislain, Ngendahimana Eric, Samson Babuwa, Bigirimana Abedi na Mugenzi Cédric
Marines FC: Ntwari Fiacre, Dusingizemungu Ramadhan, Hakizimana, Hakizimana Félicien, Hirwa Jean de Dieu, Ndayishimiye Thierry, Nsengiyumva Irshade, Dushimimana Olivier, Gikamba Ismael (c), Mugenzi Bienvenu, Ishimwe Fiston na Ngabo Mucyo Fred.
Uko amakipe yatsindanye ku munsi wa kabiri wa Shampiyona
Ku wa Mbere tariki ya 7 Ukuboza 2020
- Police FC vs Rutsiro FC (Wasubitswe kubera COVID-19)
- Musanze FC 2-1 AS Muhanga
- Mukura VS 0-0 Sunrise FC
- Rayon Sports vs Bugesera FC (Wasubitswe kubera COVID-19)
- Etincelles FC 2-1 Espoir FC
- Gasogi United vs AS Kigali (Warasubitswe)
Ku wa Kabiri tariki ya 8 Ukuboza 2020
- Kiyovu SC 0-3 Marines FC
- Gorilla FC vs APR FC (Warasubitswe)
